ഈ ചിത്രത്തിൽ കാണുന്ന മനുഷ്യനെ നമ്മളിൽ എത്രപേർ തിരിച്ചറിഞ്ഞേക്കും എന്നറിയില്ല. കാരണം പ്രശസ്തിക്കു വേണ്ടിയോ വ്യക്തിപരമായ നേട്ടത്തിന് വേണ്ടിയോ അദ്ദേഹം ഒന്നും ചെയ്തിട്ടില്ല. കണ്ടു പിടിച്ച മരുന്ന് ലോകത്തുള്ള സകലർക്കും, യാതൊരു ഭേദവും ഇല്ലാതെ ഉപകാരപ്പെടുന്നതിനായി അതിനു പേറ്റന്റ്‌ എടുക്കണ്ട എന്ന് തീരുമാനിച്ച മഹാത്മാവ് . ഇദ്ദേഹമാണ് Dr.ജോനാസ് സാൽക് (Dr. Jonas Salk), പോളിയോ വാക്സിൻ കണ്ടു പിടിച്ച വ്യക്തി. പോളിയോ വാക്സിന് പേറ്റന്റ്‌ എടുത്തിരുന്നെങ്കിൽ അദ്ദേഹത്തിന് നിഷ്പ്രയാസം ഒരു ശതകോടീശ്വരനാവാമായിരുന്നു. പക്ഷേ, ഇന്ന് എല്ലാ കുഞ്ഞുങ്ങൾക്കും സൗജന്യമായി ലഭിക്കുന്ന പോളിയോ തുള്ളിമരുന്നു അനേകകോടി ദരിദ്ര മാതാപിതാക്കളുടെ മക്കൾക്ക്‌ അപ്രാപ്യമായി തീരുമായിരുന്നു. ഒരിക്കൽ , ഒരു ടെലിവിഷൻ അഭിമുഖത്തിനിടയിൽ അദ്ദേഹത്തോട് ചോദിച്ചു – യഥാർത്ഥത്തിൽ വാക്സിന്റെ പേറ്റന്റ്‌ ആരുടെയാണ് എന്ന്. ഐതിഹാസികമായിരുന്നു അദ്ദേഹത്തിന്റെ മറുപടി – ” പേറ്റന്റ്‌ എന്നൊന്നില്ല, സൂര്യനെ പേറ്റന്റ്‌ ചെയ്യാൻ നിങ്ങൾക്ക് കഴിയുമോ ?” നമുക്കൊകെ അറിയാം സ്റ്റീവ് ജോബ്സ് ആരെന്ന്, നമുക്കറിയാം ബിൽ ഗേറ്റ്സ് ആരെന്ന്… പക്ഷേ അറിയാതെ പോവുന്നു, തന്റെ റിസർച്ചിന്റെ, ദീർഘതപസ്യയുടെ ഫലം ലോകത്തിനു സൌഖ്യത്തിനായി പ്രതിഫലം ഇഛിക്കാതെ വിട്ടു നല്കിയ മഹാനെ. അന്യർക്ക് ഗുണം ചെയ്വതിനായുസ്സു വപുസ്സും ധന്യത്വമൊട് ആത്മതപസ്സും ബലി ചെയ്ത ജഗദ്ഗുരുവിന്റെ പാതയിൽ സഞ്ചരിച്ച, പ്രവൃത്തി കൊണ്ടും ജീവിതം കൊണ്ടും മാതൃകയായ ഒരു മഹദ്വ്യക്തിത്വത്തെ നമ്മൾ അറിയാതെ പോവരുത്.